وقفة مع النفس..حدد انت بتربى أرنب لية

السلام عليكم ورحمة اللهقبل ماتربى ارنب عايزك تقعد ساعة مع نفسك ريلاااكس خالص ترجع ضهرك لورا على الكرسى وتغمض عينك تنفس بهدوء( بس من غير نوم) انا عايزك فى كلام مهم .عايزك تسأل نفسك السؤال ده... يا ترى انا بربى ارنب ليه..؟ياترى عشان اكل منه

لقمة حلوة... ولا عشان هوة اللى يكلنى...!!يا ترى عشان يريحنى...ولا المطلوب منى اشقى واريحه( ساعدته يأمر)....
مين فينا اللى حابس التانى ومنتظر منه التموين بتاعه....... من الاخر :
انا اللى هربى الارنب ولا هوة اللى هيربينى ويعلمنى الادب..
يا عم ليه برقت وجبت ضهرك لقدام رجع ضهرك لورا وغمض عينك تانى.. انا عارف ان الكلام ممكن يصدم لكن الواقع صادم اكتر بكتييييييير.
واجابة الاسئلة دى ممكن تختصر سنين ( وفلوس) ووقت من عمرك ممكن نقضيه فى اى شىء تانى
_____________________________________________________

لو كنت حضرتك من الفريق الاول( بتاع اللقمة الحلوة) يا ريت تكمل موضوعى
لو كنت من الفريق الثانى ... احم... مش عايز مد ايد.. واستنى لما انهى المقالة( عشان البرستيج وكدة ( "_ "..) .وبعدين نتفاهم )
لو كنت من الفريق الثالث وما رحتش يمين ولا شمال ولسة واقف فى النص( مبروك.... رشحوك امن مركزى)

المهم... لو عايزين نكسب من الارنب فيه شوية نقاط لازم نمشى عليها نقطة نقطة.. واللى هيعدى نقطة هتفرق معاه ان عاجلا او اجلا... نعم... لكل قاعدة شواذها ولكل شخص ظروفه لكن سنتكلم عن الاساس:
# نية صالحة عشان ربك يكرم:-
انوى انك تاكل حلال .. وتأكل ولادك حلال.. وان ربنا لو انعم عليك تتصدق وتفتح بيوت ناس غلابة...وباب النية يا اخوانى من اكبر الابواب التى ياتى منها الرزق واوسعها
# قبل ما ترمى ودنك لحد قوله ورينى شغلك:-
اللى بيتكلم كتير... وكله عامل فيها خبير ...تلاقيه يرجع ضهره للخلف ا ( زينا فى اول المقال).. ويضيق عينه وينظر فى المجهول ويمصمص بشفايفه ويتكلم فى وجد وهيام عن ايام الارانب ايام ما كان عنده (خماشر أرنب) طول دراعه( خد بالك دايما يعمل ايده اليمين سيف يد ويضعها على دراعه الشمال قبل الكتف بشوية وهو بيتكلم عن طول الارانب اللى كان عنده) ولما تسأله عن الحال دلوقتى .مش بعيد يقولك عين ام فاروق اللى فلقت الحجر
اللى زى الاخ اسمع له لو اتكلم فى السياسة) لو اتكلم فى الكورة ... اسمع له فى اى شى الا لو اتكلم فى الارنب

# ابدأ صغير تكبر.. ابدأ كبيرممكن تخسر:-
بلاش تلخبط نفسك وإدى نفسك كل الوقت وخللى سنة كاملة (اربع فصول )تمر عليك وانت عندك عدد محدود لأن كل فصل ليه مشاكله غير التانى
ولما تحس انك لميت الموضوع ابقى اتوسع براحتك

#جهز مكانك قبل الفاس ما تقع فى الراس:-
مش بعد ما تدخل الارانب فى المكان عندك. تفتكر ان انت لسة مركبتش شفاط او مكسرتش مكان شباك للتهوية او تلاحظ ان السقف بينقط وهكذا

# لو مكانك ينفع .. ابعد عن الرأسى وغني له:-
طبعا المكان هوة الى حاكمك لكن حاول قدر الامكان تجنب البطارية الرأسى ففيها عيوب كثيرة منها صعوبة التنظيف... صعوبة ملاحظة الام خصوصا فى الدور السفلى.. صعوبة اخراج الام خاصة للتلقيح.... صعوبة التهوية...الخ ده عن تجربة وبراحتك..
# قول سلالتك منين اقوللك تكسب كام:-
لا تحتاج الى تعقيب

# العلف هوه الاساس مش خبرتك:-
علف نضيف معناه اتقاء 70% من مشاكل التربية ...


# اوعى تفوت ولا تطنش ولا تقول ملّيت:-

اوعى تفوت حالة مرضية عندك حتى لو عطس خفيف
اوعى تطنش اى تحصين
ولا تقول مليت وخللى نفسك طويل ... لاحظ ان اول فلوس تمسكها من الارانب مش هتكون قبل تلات شهور على الاقل من اول تلقيح ناجح
علشان كدة ظبط مصارفيك وجيب علف يكفيك لغاية ما تطلع انتاج علشان ماتجيش فى النص وتقول يا مين يسلفنى...
عن تجربة ... قبل المشروع لو مفيش سيولة كافية اعمل جمعية سنة سنتين براحتك ولما تقبضها اعمل مشروعك مرتاح

# مش أى بيطرى ولا كل الزراعى بيفهم فى الارنب:-
إللى بيفهم فى الفراخ كتييييير .. اللى بيفهم فى العجول كتيييييييير
بس خد بالك من موضوع الارانب بالذات مش اى حد تسأله... وخللى عندك حذر فى النقطة دى بالذات... عادة هتلاقى الارنب عايز مهندس زراعى مش دكتور بيطرى
ودى مش قاعدة بس دة اللى غالب... ومش اى زراعى كمان.. حتى لو كان دكتور فى الجهة الفلانية وحاصل على اعلى الشهادات

# سيبك من نصايح الناس الطيبة بتاعت زمااان:-
الناس الطيبة اللى كان ربنا ساترها معاها ومبارك لها فى اى شىء بتشتغل فيه علشان قلبها ابيض وعلى سجيتها
اللى مكنتش بتأكل الا برسيم وشعير وردة ومكنتش بتحط مية خالص للارنب فى الشتاء
ولو الارنب تعب هما قرص دوا من الصيدلى ويتدق ويدوبوه المياة والارنب بيرجع فعلا زى البمب
الناس الطيبة الى كانت بتعالج الجرب بزيت الماكينات المستعمل لا ايفوماك ولا ديازينون ولا وجع دماغ وكان الارنب زى الفل
الاساليب دى كانت بتنفع زمان لما كان كل شىء رخيص ومكانش انتشار الامراض زى دلوقتى والعترات مكانتش موجودة اصلا بالقوة دى.... لكن دلوقتى ماعاد ينفع
الناس دول أقل واحد عنده 65 سنة دلوقتى.....
الله يرحمك يا عم مصطفى يا ابو محمد... ويا عم جمال توفيق... قولوا امين
قولو ا أمين بجد

# احفظ الجميل لمن علمك وشيله على راسك من فوق:-
اللى بيعلم( صح) دلوقتى صعب تلاقيه... وبيبقى رزق ربنا باعتهولك ونعمة صونها واحفظ جميله لانه هيبقى ان شاء الله سبب من الله فى اكل عيشك

# اوعى تتكبر على اللى داخل جديد وافتكر حالك زمان:-
واعرف انك كل ما تيسر على خلق الله ربنا بييسر عليك اضعاف مضاعفة ...
والله اضعاف مضاعفة دة عن تجربة وواقع عملى

# اياك من كتمان المعلومة:
وتذكر قول النبى صلى الله عليه وسلم (والله فى عون العبد ما دام العبد فى عون اخيه)

# لو مش عارف قول مش عارف وأسال وانت المستفيد:-
إياك تفتى ... ممكن تبتكر طريقة جديدة .. تعدل من اسلوب قديم.. دة شىء ربنا يجازيك عليه ويجعله فى ميزان حسناتك
لكن تفتى فى امر مسلم بيه.. او تنقض اساس علمى. فده معناه انك غير مؤهل... وسكوتك افضل.. لان سكوتك هيكون ساعتها فائدة للناس.. وربنا ساعتها هيجازيك خير على سكوتك مش كلامك.. حتى لو تجربتك شخصية بلاش تعممها من غير ما تدرس ليه عندك بس ناجحة وعند غيرك فاشلة



#متبقاش مربى تقليدى وحاول تتطور اساليبك:-
عندك نظام الامهات الحبيسة.....استعمل بروبيوتك.... لقح صناعى لو عددك كبير...
انت وظروفك ... مش كل الاساليب تنفع مع كل الناس لكن المهم طور على قد ما تقدر
اقرأ ابحاث ( معروفة المصدر)


# الصلاة ... الصلاة ... الصلاة:

أنا اجلتها للاخر علشان تركز فى الدماغ
( لا بارك الله فى رزق يلهى عن الصلاة) طبعا مش عايزة تعليق

والله المستعان

طباعة المقال

أرسل إلى صديق

مقالات اخرى

التكاثر في الحمام

يتميز الحمام بقدرته علي التكاثر السريع في أى مكان تتوفر فيه مصادر التغذية ومياه الشرب ، وعند تدخل المربي في عملية التربية فإن ذلك يؤدى إلي تحسين كبير في النسل وبالتالي الحصول علي أرباح مادية وفيرة . ١ - المزاوجة يختلف عمر النضج الجنسى عند الحمام وذلك... المزيد

الرعاية الصحية للحمام

أسس النجاح تجديد التهوية لمسكن الحمام بطريقة جيدة. أن يكون مسكن الحمام جاف ومناسب لأعداد الطيور. أن يكون الطعام متوازن وجيّد. أن يكون المربي والهاوي صبور ولديه القدرة والاهتمام بالتربية. تغذية الطيور طبقاً لحاجتها وتدريبها ( رحلات تدريب = طاقة عالية=... المزيد

علامات اقتراب ووضع البيض فى الحمام

يتبع الذكر الأنثى كلما خرجت من العش ولو كان خروجها للتغذية،ويطاردها الذكر حتى ترجع للعش وذلك بالنقر على رأسها والمطاردة تهيأ جسم الحمامة لوضع البيض لأنها تفصل أرحامها، كما أن الذكر يخاف بشدة على أن ترمي الأنثى البيض خارج العش الذي أعده لها، ومتى ما تم وضع... المزيد

لحم الحمام

كشفت دراسة علمية مصرية أن لحم الحمام ما زال هو الأفضل بين لحوم سائر أنوع الطيور، اذ ما زال الحمام يفرخ ويتغذى ويربى بالطرق التقليدية بعيدا عن المفرخات الآلية أو الاعلاف الصناعية. وتقول الباحثة بمعهد صحة الحيوان التابع لوزارة الزراعة المصرية الدكتورة عفت... المزيد

سلالات الأرانب.. تكوين قطيع الأرانب.. أنواع العنابر

سلالات الأرانب التي يمكن الاستعانة بها من اجل مشروع إنتاج الأرانب 1- الأرانب المصرية (البلدي الأحمر، البلدي الأسود، الجبلي المصري). 2- أرانب مستنبطة (الأبرى) وهى مهجنة من الأرانب البلدية وأسبانية وتتميز بتحملها لظروف الجوية العالية الحرارة. 3- الأرانب... المزيد